འཐབ་གྲོགས་ཁྱེད་ལ་སྨོན་ལམ་འདེབས་བཞིན་ཡོད།

འཐབ་གྲོགས་ཁྱེད་ལ་སྨོན་ལམ་འདེབས་བཞིན་ཡོད།
༄༅། དེ་སྔ་བོད་ནང་རེག་དུག་ནད་གཞིའི་སྐོར་གཞུང་འབྲེལ་མིན་པའི་ཚོགས་པའི་ནང་ཕྱག་ལས་གནང་མཁན་དང༌། ཕྱི་ལོ་་ 1989་ ལོར་ཆབ་སྲིད་གནད་དོན་རྐྱེན་པས་བཙོན་དུ་ལོ་ 3་ བཙོན་བཅུག་སྐབས་ 1991་ ལོར་སླར་ཡང་བཙོན་ཁང་ནང་བོད་ཞི་བས་བཅིངས་འགྲོལ་བཏང་བ་ཟེར་བར་ངོ་རྒོལ་སྐད་འབོད་བྱ་མཁན་གཙོ་བོའི་གྲས་སུ་རྩིས་ཏེསླར་ཡང་ལོ་ 4་སྤར་ཏེ་ཁྱོན་མི་ལོ་ 7་བཙོན་བཅུག་མྱངས་ཞིང༌། སླར་ཡང་ཕྱི་ལོ་ 2008་ ལོར་ཆབ་སྲིད་ཀྱི་གནད་དོན་ཡོད་པར་ཉེས་འཛུགས་བྱས་ཏེ་ཚེ་གང་བཙོན་བཅུག་བྱ་རྒྱུའི་ཐག་གཅོད་བྱས་ཏེ་ད་ལྟ་ལྷ་སའི་ཆུ་ཤུལ་བཙོན་ཁང་ནང་ཚེ་བཙོན་གྱི་དུས་བཀག་འཁུར་བཞིན་ཡོད་པའི་ཕྲན་གྱི་བཙོན་གྲོགས་དབང་འདུས་ལགས་གཙོས་པའི་བོད་ཁྱོན་ཡོངས་ཀྱི་འཐབ་གྲོགས་རྣམས་གང་མགྱོགས་གློད་བཀྲོལ་དང་སྡུག་བསྔལ་ལས་ཐར་བ་དང་། སྙིང་ལ་བརྣག་པའི་འདོད་དོན་གང་མྱུར་གྲུབ་པའི་སྨོན་ལམ་ཞུ་རྒྱུ་མ་ཟད། དེ་རིང་རྒྱལ་སྤྱིའི་རེག་དུག་ཉིན་མོའི་ World Aids Day དང་བསྟུན་ལས་རིགས་འདིའི་ཐད་རང་ནུས་གང་ཡོད་ཀྱིས་སྤྱི་ཚོགས་ཞབས་འདེགས་ཞུ་མཁན་ཁོང་དང་ཁོང་འདྲ་བར་ཐུགས་སྣང་ཡོང་བའི་རེ་བ་ཡོད༎