Saturday, November 8, 2008

要求中央改变交恶达赖喇嘛的政策/高洪明

༄༅། ཀྲུང་དབྱང་གིས་ཏཱ་ལའི་བླ་མར་སྡང་པོ་བྱེད་པའི་ སྲིད་བྱུས་འགྱུར་བ་གཏོང་དགོས། ཀའོ་ཧོང་མིང་Gao Hong Mingགིས།
སྒྱུར་མཁན་གྱི་མཆནཿ ཀའོ་ཧོང་མིང་གིས་བྲིས་པའི་གནས་ཚུལ་དེ་ནི་ ༢༠༠༨ ཕྱི་ཟླ་ ༡༡ ཚེས་ ༧ ཉིན་སྦོ་ཤུན་Boxunརྒྱ་ཡིག་དྲྭ་རྒྱའི་ནང་བཀོད་ཐོན་བྱུང་ཡོད་། སྔ་དྲོ་པེ་ཅིང་ཞོགས་ཚགས་ཀློག་སྐབས་འདི་ཚེས་ ༦ ཉིན་ཏུ་ཆིང་ལིན་གྱིས་ཏཱ་ལའི་བླ་མའི་སྒེར་གྱི་སྐུ་ཚབ་མི་སྣ་ཐུག་པ་ དང༌། ཀྲུང་དབྱང་གི་ཚབ་བྱས་ནས་ཏཱ་ལའི་བླ་མས་ཆབ་སྲིད་ཀྱི་འདོད་ཚུལ་ཡོང་བསྲང་བྱེད་དགོས་པའི་རེ་བ་བཏོན་ཡོད་པ་ཤེས་རྟོགས་བྱུང༌། ངས་ཀྲུང་དབྱང་གིས་ཏཱ་ལའི་བླ་མར་སྡང་པོ་བྱེད་པའི་སྲིད་བྱུས་འདིར་འགྱུར་བ་གཏོང་དགོས་པའི་ངོས་འཛིན་བྱེད་ཀྱི་ཡོད། རྒྱུ་མཚན་གཤམ་དུ་བཀོད་ཡོད། ༡༽ ཏཱ་ལའི་བླ་མས་ཉུང་མཐར་ཡང་མི་ལོ་ཉི་ཤུར་ཉེ་བའི་རིང་ཀྲུང་དབྱང་གིས་བོད་རང་སྐྱོང་བྱེད་ཆོག་པའི་རེ་འདུན་ཞུས་ཡོད་པ་ལས། “བོད་རང་བཙན་དང༌། ཕྱེད་རང་བཙན་ནམ་ཡང་ན་རྣམ་པ་འགྱུར་བའི་རང་བཙན་”བྱེད་རྒྱུའི་ཆབ་སྲིད་ཀྱི་འདོད་ཚུལ་བཏོན་མེད། ༢༽ ཏཱ་ལའི་བླ་མས་བོད་རང་སྐྱོང་བྱེད་རྒྱུའི་རེ་འདུན་བྱེད་པ་ལས་རྒྱལ་ཁབ་ཁ་བྲལ་བཏང་མེད་ལ་ཀྲུང་ཧྭ་མི་རིགས་ཀྱི་གཅིག་གྱུར་དེ་བས་གཏོར་བཤིག་བཏང་མེད། གང་ཡིན་ཟེར་ན། རང་སྐྱོང་དང་རང་བཙན་ནི་ཆབ་སྲིད་ཀྱི་ཐ་སྙད་དང༌། ཁྱབ་ཚད་རྩ་བ་ནས་མི་འདྲ་བའི་གཉིས་ཡིན། ༣༽ ཀྲུང་གུང་ཀྲུང་དབྱང་གིས་ག་དུས་ཡིན་རུང་ཏང་ནི་ཐམས་ཅད་ལ་འགོ་ཁྲིད་བྱེད་མཁན་ཡིན་པའི་ལྟ་བ་ཞིག་བཟུང་གི་ཡོད། དེར་བརྟེན་ག་དུས་ཡིན་རུང་མི་རིགས་རང་སྐྱོང་གི་རེ་བ་བྱེད་པའི་གཏམ་སྤྱོད་དང༌། དེའི་ཚབ་མཚོན་མི་སྣ་རྣམས་རྒྱལ་ཁབ་ཁ་བྲལ་གཏོང་མཁན་དགྲར་འཛིན་སྟོབས་ཤུགས་དང༌། རང་བཙན་རྩོད་མཁན་གྱི་སྐུ་ཚབ་ལ་ངོས་འཛིན་བྱེད་ཀྱི་ཡོད། དེ་ནི་དུས་ལས་ཡོལ་ཟིན་པའི་གྲལ་རིམ་འཐབ་རྩོད་ཀྱི་བསམ་བློའི་རྒྱུན་མཐུད་པ་ཞིན་ཡིན་སྟབས་དེས་ཀྲུང་ཧྭ་མི་རིགས་དོན་དམ་གྱི་མཐུན་སྒྲིལ་དང༌། གཅིག་གྱུར་ཡོང་རྒྱུར་ཕན་ཐོགས་མེད་པ་ཞིག་རེད། ༤༽ བོད་རིགས་སྤུན་ཟླ་རྣམས་ཀྱི་ལངས་ཕྱོགས་དང༌། བོད་བརྒྱུད་ནང་བསྟན་ཆོས་ལུགས་ཀྱི་ལངས་ཕྱོགས་ཐོག་བསྡད་ནས་བསམ་བློ་ཞིག་ཐོངས་དང༌། གུང་བྲན་རིང་ལུགས་ཀྱི་ལྟ་བ་ཞིག་དང༌། གུང་བྲན་ཏང་གི་ཚོགས་པ་ཞིག་ནས་བོད་འཛིན་སྐྱོང་བྱེད་པ་འདིས་བོད་བརྒྱུད་ནང་བསྟན་གྱི་ཆོས་དད་རང་དབང་ཡོང་གི་རེད་དམ། བོད་རིགས་ཀྱི་ཆོས་དང་རིག་གཞུང་རྒྱུན་འཛིན་ཐུབ་བམ། མི་རིགས་རང་སྐྱོང་དོན་འཁྱོལ་ཐུབ་བམ། ༥༽ ཏང་གི་འགོ་ཁྲིད་དང༌། སྤྱི་ཚོགས་རིང་ལུགས་ནི་ཀྲུང་གོའི་མི་རིགས་ས་ཁོངས་རང་སྐྱོང་ལམ་ལུགས་དངོས་སུ་ལག་བསྟར་དོན་འཁྱོལ་ཡོང་ཐབས་མེད་པའི་གནད་འགག་ཐུག་ས་ངོ་མ་དེ་ཡིན་པ་བརྗོད་མ་དགོས་པ་རེད། སྤྱི་ཚོགས་རིང་ལུགས་ཀྱི་རྒྱལ་ཁབ་ཅིག་ཡིན་ཕྱིན་མི་རིགས་རང་སྐྱོང་གི་གནད་དོན་ཐག་གཅོད་ཡག་པོ་བྱེད་ཐུབ་མཁན་གཅིག་ཀྱང་མེད། དེ་ནི་སྤྱི་ཚོགས་རིང་ལུགས་ཀྱི་རྒྱལ་ཁབ་བཅུ་གྲངས་ཁ་ཤས་ཐོར་ཞིགས་སུ་མ་འགྲོ་སྔོན་གྱི་ལོ་རྒྱུས་ཐོག་ནས་གསལ་བཤད་གསལ་པོ་བྱས་ཡོད། ༦༽ དེང་རབས་རྒྱལ་ཁབ་དང༌། དེང་རབས་རྒྱལ་ཁབ་ཀྱི་གཞུང་འཛིན་ཚོགས་པ་གང་འདྲ་ཞིག་ཡིན་རུང་རྒྱལ་ཁབ་དེའི་གྲངས་ཉུང་མི་རིགས་ལ་རང་སྐྱོང་དབང་ཆ་འཐུས་ཚང་སྤྲད་ནས་རང་ཉིད་རྒྱལ་ཁབ་ཀྱི་བརྟན་ལྷིང་དང༌། གོང་འཕེལ་སྲུང་འཛིན་མི་བྱེད་མཁན་གཅིག་ཀྱང་མེད། ཀྲུང་གུང་ཀྲུང་དབྱང་དང༌། ཀྲུང་གོའི་ཀྲུང་དབྱང་སྲིད་གཞུང་གིས་རྒྱལ་ཁབ་གཞན་ལ་སློབ་སྦྱོང་མི་བྱེད་པའི་རྒྱུ་མཚན་གང་ཡིན་ནམ། ༧༽ ཀྲུང་དབྱང་གིས། ཏཱ་ལའི་བླ་མས་བཏོན་པའི་ཆབ་སྲིད་ཀྱི་རེ་འདུན་ནི་བོད་རིགས་མི་དམངས་རྣམས་ཀྱི་འཕྲལ་ཕུགས་ཁེ་ཕན་གྱི་ཚབ་ངོ་མ་དེ་ཡིན་པ་དངོས་སུ་མཐོང་བ་བྱེད་དགོས། ཏཱ་ལའི་བླ་མའི་ཆབ་སྲིད་ཀྱི་རེ་འདུན་ཁས་ལེན་མ་བྱས་པར་རྩིས་མེད་གཏོང་རྐྱང་བྱས་པ་ཡིན་ན། བོད་བརྒྱུད་ནང་བསྟན་ཆོས་ལུགས་ནི་བོད་བརྒྱུད་ནང་བསྟན་ཆོས་ལུགས་ངོ་མ་ཆགས་ཀྱི་མེད་པ་དང༌། བོད་རིགས་ནི་བོད་རིགས་ངོ་མ་ཆགས་ཀྱི་མེད་ཅིང༌། བོད་ནི་བོད་ངོ་མ་ཆགས་ཀྱི་མེད། ༨༽ ཀྲུང་དབྱང་གིས་ཏཱ་ལའི་བླ་མར་སྡང་པོ་བྱེད་པའི་སྲིད་བྱུས་ལ་འགྱུར་བ་གཏོང་དགོས། ཀྲུང་དབྱང་གི་འདོད་ཚུལ་གྱིས་ཏཱ་ལའི་བླ་མའི་འདོད་ཚུལ་རྦད་དེ་རྡོག་རོལ་གཏོང་གི་ཡོད་པ་དེ་ནི་ཏཱ་ལའི་བླ་མར་སྡང་སེམས་འཛིན་པའི་སྲིད་བྱུས་ཡིན་པ་དང༌། དེས་ཀྲུང་དབྱང་གིས་ཏཱ་ལའི་བླ་མར་ལྷག་བསམ་རྣམ་དག་བྱེད་རྒྱུ་འདང་གི་མེད་པ་ཏག་ཏག་གསལ་བཤད་བྱས་ཡོད། ༩༽ ཀྲུང་དབྱང་གིས་ཏཱ་ལའི་བླ་མར་བཟང་པོའི་བརྡ་ལན་བྱེད་དགོས་པ་དང༌། ཁོང་ལ་ཡག་པོ་བྱས་ནས་ཁོང་ནི་བོད་ཀྱི་རང་སྐྱོང་གནད་དོན་ཐག་གཅོད་བྱེད་པའི་གསེར་གྱི་ལྡེ་མིག་གཅིག་རང་དེ་ཡིན་པར་ངོས་འཛིན་བྱེད་བྱེད་དགོས། ཁ་ནས་ཀྲུང་དབྱང་དང་ཏཱ་ལའི་བླ་མའི་དབར་འབྲེལ་མོལ་གྱི་སྒོ་ཆེན་ག་དུས་ཡིན་རུང་ཕྱེ་ཡོད་ཅེས་བཤད་པ་དང༌། དོན་དངོས་ཐོག་འབྲེལ་མོལ་གྱི་ཁང་པའི་སྒོ་ནི་ནམ་ཡང་བརྒྱབ་ཡོད་པ་རེད། དེ་འདྲ་གཏན་ནས་བྱེད་རྒྱུ་མེད། དེ་འདྲ་བྱས་པ་ཡིན་ན། བོད་ཀྱི་གནད་དོན་ནམ་ཡང་ཐག་གཅོད་མི་ཐུབ་ཅིང༌། དེ་འདྲ་བྱས་ན་བོད་ཀྱི་གནད་དོན་ག་དུས་ཡིན་རུང་ཀྲུང་གོའི་རྨ་ཁ་ཞིག་ཆགས་རྒྱུ་ཡིན། པེ་ཅིང་གི་གྲོང་མི་ཀའོ་ཧོང་མིང་གིས་བྲིས།།