Thursday, January 24, 2013

<<བོད་ནང་བོད་མིས་རང་ལུས་མེར་བསྲེགས་ཐད་དུ་བསམ་ཚུལ་གླེང་བ།>> ང་ཚོས་ཤེས་ཐུབ་པར་དོན་གྱི་བདག་པོ་ནི་བོད་ནང་ཡོད་པའི་བོད་མི་ཚོ་ཡིན་པ་དང་། ས་གནས་ས་ཐོག་གི་གནས་ཚུལ་ནི་བོད་ནང་དུ་ཡོད་པའི་བོད་མི་ཚོས་གསལ་ཤོས་ཤེས་ཀྱི་ ཡོད་པ་གསལ་པོ་རེད། ཉེ་བའི་ཆར་བོད་མིའི་...འཐབ་རྩོད་ཁྲོད་དུ་རང་ལུས་མེར་བསྲེགས་ཀྱི་ངོ་ རྒོལ་གནང་སྟེ་རྒྱ་ནག་གཞུང་གི་ད་ལྟའི་བོད་ཐོག་འཛིན་པའི་སྲིད་བྱུས་ལ་མི་འདོད་ པའི་རྣམ་འགྱུར་མཚོན་པར་བྱ་བཞིན་ཡོད་ལ། གནས་སྟངས་དེ་འདྲའི་འོག་ཏུ་རང་ལུས་མེར་བསྲེགས་བརྗོད་གཞིར་བཞག་ནས་བགྲོ་གླེང་ དང་བསམ་ཚུལ་འདྲ་མིན་སྤེལ་བཞིན་ཡོད་པ་མ་ཟད། རང་ལུས་མེར་བསྲེགས་མཚམས་འཇོག་ཡོང་ཐབས་སུ་འབོད་བསྐུལ་ཞུ་མཁན་ཡང་བྱུང་ཡོད། སྟབས་བདེ་པོར་མཚམས་འཇོག་བྱ་རོགས་ཞེས་པ་ནི་ཁ་ནས་བཤད་ཐུབ་པ་ཞིག་ཡིན་ཀྱང་། མཚམས་འཇོག་བྱ་རྒྱུར་རང་ལུས་མེར་བསྲེགས་མཁན་ཚོའི་དགོས་འདུན་པ་བདག་སྤྲོད་བྱ་ མཁན་ངོ་མ་དེ་རྒྱ་ནག་གཞུང་ཆགས་ཡོད་པ་དང་། དེ་དག་ལ་འབོད་བསྐུལ་དང་དྲང་པོའི་བདེན་དཔང་བྱ་མཁན་གཙོ་བོ་དེ་དག་ནི་བོད་ཀྱི་ ས་གནས་ཁག་ཏུ་ཡོད་པའི་སེར་སྐྱ་ལས་སྣེ་ཚོ་ཡིན་པ་སྨྲོས་མེད་རེད། དེ་བས་ཀྱང་རྒྱ༌ནག་གཞུང་གིས་རང་ལུས་མེར་བསྲེགས་སྐོར་ལ་འཁྱོག་བཤད་འདྲ་མིན་བྱ་ བཞིན་ཡོད་པ་དང་། བོད་ནང་ཡོད་པའི་ཆོས་ལུགས་མི་སྣ་དང་བརྒྱུད་ལམ་འདྲ༌མིན་བེད་སྤྱོད་བྱེད་པ་མ་ ཟད། ཐ་ན་ཀྲུང་དབྱང་བརྙན་འཕྲིན་ལས་ཁུངས་སོགས་ནས་རྫུན་གཏམ་ལྷུ་སྒྲིག་སྟེ་རང་ལུས་ མེར་བསྲེགས་ནི་ཕྱི་ཕྱོགས་ནས་བརྒྱུད་བསྐུལ་བྱས་པ་ཞིག་ཡིན་པར་གླེང་ཕྱོགས་ བསྐྲུན་བཞིན་ཡོད་པའི་རྫུན་གཏམ་གྱི་མཐིལ་རྟོལ་རྒྱུ་ནི་ས་གནས་ས་ཐོག་གི་མི་ སྣ༌ཚོས་བདེན་དཔང་བྱ་ཐུབ་མིན་ལ་རག་ལུས་ཡོད། ཚེ་སྲོག་རྩ་ཆེན་ཡིན་ལ་མི་ཚེ་དོན་སྙིང་ལྡན་པ་ཞིག་དགོས་རྒྱུ་ནི་འགྲོ་བ་ཡོངས་ ཀྱི་འདོད་མོས་གཅིག་མཐུན་རེད། ནམ་ཡིན་ཡང་བྲན་གཡོག་དང་གཉའ་གནོན་ཁོ་ནའི་འོག་ཏུ་སྡོད་འདོད་མེད་པ་དེའང་འགྲོ་ བ་ཡོངས་ཀྱི་འདོད་མོས་གཅིག་མཐུན་རེད། བྱས་ན་བོད་ནང་བོད་མི་ཚོས་རང་ལུས་མེར་བསྲེགས་མུ་མཐུད་བཏང་སྟེ་རྒྱ༌ནག་གཞུང་ གི་སྡུག་རྩུབ་སྲིད་བྱུས་ལ་ངོ་རྒོལ་བྱ་གི་ཡོད་པ་རེད་དམ། རང་ལུས་མེར་བསྲེགས་སྤེལ་མཁན་དེ་དག་གང་འདྲ༌ཞིག་ཡིན་ནམ། རྒྱ་ནག་གཞུང་གིས་འཁྱོག་བཤད་བྱེད་བཞིན་པ་ལྟར་རེད་དམ། ཁོང་རྣམ་པའི་དགོས་འདུན་ག་རེ་རེད་དམ། དྲི་བ་དེ་ལ་སོགས་པའི་གནད་དོན་ཐད་དུ་ད་ལྟ་མཚོ་སྔོན་བོད་རིགས་་ཞིབ་འཇུག་ཚོགས་ པའི་རྒྱུན་ལས་ནགས་ཚང་ནུས་བློ་ལགས་ནས་བསམ་ཚུལ་ཁ་གསལ་ཞིག་གསུངས་གནང་འདུག་པར་ ཐུགས་སྣང་ཅན་ཚོས་གཟིགས་དཔྱད་ཡོང་བ་ཞུ་་་་་ http://www.bodrigs.com/special/nagtsang/2013-01-15/529.html སྤེལ་དུས། 2013-01-15 17:20:05 ཡོང་ཁུངས། མཚོ་སྔོན་བོད་རིགས་དྲ་བ། རྩོམ་ པ་པོ། ནགས་ཚང་ནུས་བློ། ཀློག་གྲངས། 209
ལོ་འདི་འགའི་རིང་བོད་མི་མང་ཙམ་གྱིས་རང་ལུས་མེ་སྲེག་བཏང་སྟེ་ཞི་བའི་འགོག་ རྒོལ་བྱེད་པའི་ཡ་ང་བའི་གནས་ཚུལ་མང་ཙམ་བྱུང་དང་འབྱུང་བཞིན་ཡོད་པ་ནི་ཀུན་ གྱིས་རིག་མཐོང་མེད་ནའང་འོན་པ་ཞིག་མིན་ན་ཚང་མས་གོ་ཡོད་ཚོད་རེད།དང་ཐོག་བླ་མ་ གྲྭ་བ་དང་ཇོ་མོ་སོགས་ཀྱིས་སྐུ་ལུས་མེ་སྲེག་བཏང་སོང་། དེ་ནས་ཡང་མྱི་སྐྱ་ཕོ་མོ་དང་།ན་གཞོན་ལོ་ཉུང་དང་སློབ་མ་སོགས་ཀྱིས་སྐུ་ལུས་མེ་ སྲེག་བཏང་སོང་།ད་བར་རྒྱལ་ནང་ནས་བོད་མི་གོ་བདུན་ཙམ་གྱིས་སྐུ་ལུས་མེ་སྲེག་ བཏང་སྟེ་མཆོད་འབུལ་བྱས་སོང་།འདི་ཅི་རེད།འདི་ཅིའི་ཕྱིར་རེད།འདི་ཅི་ཞིག་གི་ དོན་དུ་རེད།འདི་དོན་བཟང་བོ་ཞིག་རེད་དམ་དོན་ངན་པ་ཞིག་རེད།འདི་ནི་ཕན་ཐོགས་ ཡོད་པ་ཞིག་རེད་དམ་གནོད་པ་ཡོད་པ་ཞིག་རེད།འདི་ནི་མུ་མཐུད་དུ་སྤེལ་དགོས་པ་ཞིག་ རེད་དམ།འདི་ནི་ངེས་པར་དུ་མཚམས་འཇོག་བྱེད་དགོས་པ་ཞིག་རེད།དོན་འདི་དག་དང་དྲི་ བ་འདི་དག་ནི་བོད་མི་ཡོངས་ཀྱིས་མཐོ་དམན་དྲག་ཞན་མེད་པར་ཀུན་གྱི་མདུན་དུ་གསལ་ བོ་བཞག་ཡོད་ཅིང་།ཚོར་བ་བཀག་མེད་པའི་བོད་མི་ཞིག་ཡིན་ན་དོན་འདི་དག་དང་དྲི་བ་ འདི་དག་ལ་གཡོལ་ཐབས་མེད་པ་དང་ངེས་པར་དུ་བསམ་བློ་ཡང་ཡང་གཏོང་དགོས་པ་ཞིག་དང་། ངེས་པར་དུ་བདེན་དྲང་གི་བརྡ་ལན་གསལ་བོ་རེ་འདེབས་དགོས་པའི་དུས་ལ་སླེབས་ཡོད་ པར་འདོད། ཁྱེད་རྣམས་ཀྱིས་གསུངས་པ་ལོས་བདེན།བོད་མི་ཞིག་ཡིན་པའི་ཆ་ནས་རང་གི་མི་རིགས་ ཀྱི་ཁྲོད་དུ་དོན་དག་ཆེན་པོ་འདི་འདྲ་བྱུང་བར་མི་སུ་དང་སུ་ཡིན་ཀྱང་རང་རང་གི་ ལྟ་ཚུལ་དང་བསམ་ཚུལ་རེ་ཡོད་ཁོ་ཐག་རེད།འོན་ཀྱང་མི་རང་རང་གི་ལྟ་ཚུལ་སོགས་རང་ གི་འདོད་པ་ལྟར་བཤད་དང་མི་བཤད། བཤད་ཆོག་དང་མི་ཆོག བཤད་ཕོད་དང་མི་ཕོད།འདི་ནི་མི་རང་རང་གི་འཚོ་གནས་ཀྱི་གནས་ཚུལ་སོགས་མི་འདྲ་བས་ གཅིག་མཐུན་ཡོང་དཀའ་མོ་རེད། དཔེར་བརྗོད་ང་འདྲ་བ་ཞིག་ལ་ཆ་བཞག་ན།རང་གི་གླ་ཕོགས་ལ་བརྟེན་ཏེ་འཚོ་བ་རོལ་ བཞིན་ཡོད།ཐ་ན་རང་གི་ལུས་དབང་དང་ཤི་གསོན་གྱི་འདེམས་དབང་ཡང་གཞན་དབང་དུ་ཤོར་ ཡོད་མཁན་ཞིག་གིས་ཡོན་བདག་གི་ངན་མཚང་དང་འབྲེལ་ཡོད་པའི་དོན་ཆེན་འདི་དག་ལ་རང་ གིས་འདོད་པ་ལྟར་ལན་ཞིག་འདེབས་པའི་རང་དབང་མེད་ལ།ཡོན་བདག་ལ་ཕོག་ཐུག་གཏོང་བའི་ ཕོ་ཚོད་ཀྱང་ང་ལ་མེད་པ་འདྲ་རེད། གཏམ་དྲང་མོ་བཤད་ན་ནག་ཉེས་ཡིན་པ་ངས་ན་ནིང་ནས་ཧ་གོ་སོང་། ཡང་ན་རྫུན་གཏམ་ཇ་འཐུང་ངོ་དགའ་ཞིག་བཤད་དེ་མྱི་རང་གཉིས་ཀ་མགོ་སྐོར་གཏོང་བའི་ གོམས་གཤིས་ང་ལ་སྔ་མོ་ནས་མེད། དེ་བས་གསེར་སྐུ་ཐུགས་རྗེ་ཆེན་པོ་ལ་ངས་ཀྱང་ལག་པས་མཐོ་འཇལ་བྱེད་དགོས་དོན་མེད་ པ་འདྲ་ཞིག་རེད། འོན་ཀྱང་། ཅི་བཤད་ཀྱང་རང་ལུས་མེ་སྲེག་གཏོང་བ་ནི་རང་ཤི་རྒྱག་པ་ལས་མི་གཞན་གྱི་ཚེ་སྲོག་ ལ་གནོད་པ་བྱེད་ཀྱིན་མེད་པའི་ཞི་བའི་འགོག་རྒོལ་ཞིག་ཡིན་པ་ནི་ཀུན་གྱིས་གསལ་ ཐག་ཆོད་རེད། དང་ཐོག་བླ་མ་གྲྭ་བ། རྗེས་སུ་མྱི་སྐྱ་ཕོ་མོ་རྒན་གཞོན་རང་ལུས་མེ་སྲེག་གཏོང་མཁན་ཚང་མ་ནི་རང་རང་གི་ སེམས་སུ་བླ་ན་མེད་པའི་རེ་སྨོན་དང་དམིགས་ཡུལ་གསལ་བོ་རེ་ཡོད་ཁོ་ཐག་ཡིན་པ་དང་། ད་གཟོད་ཤི་ཡང་འགྱོད་པ་མེད་པར་སེམས་ཐག་བཅད་དེ་རང་ལུས་མེ་སྲེག་གཏོང་བཞིན་ཡོད་ པ་ཡང་ཧ་ཅང་གསལ་བོ་ཡིན་པ་ཀུན་གྱིས་གསལ་འདུག དྲག་ཏུ་འབར་བའི་མེ་ལྕེ་དམར་བོའི་ཁྲོད་དུ་ང་རང་གིས་ཤ་ཚ་བའི་སེམས་སྡུག་དང་ ཡིད་སྐྱོ་ཞིང་ཁྲག་དྲི་བྲོ་བའི་མིག་ཆུ་སྟེ་ལྐོག་ཏུ་རང་གི་ཁོག་ཏུ་མིད་པ་ལས་ ཐབས་གཞན་ཅི་ཡང་མེད་སོང་། ཐ་ན་སྡུག་གཏམ་བཤད་ས་ཞིག་ཀྱང་རོགས་སུ་མ་ཆུད། རང་གི་བློ་སེམས་རྩེ་གཅིག་གིས་ངུ་འབོད་ཞུ་འདོད་པ་ནི་སྐུ་ཚེ་རྣམས་ལ་གཏུམ་དྲག་ གི་ཉེས་སྤྱོད་ཅི་འདྲ་ཁུར་དགོས་པ་ཐུག་ཀྱང་། སྐུ་ལུས་མེ་སྲེག་མ་གཏོང་རོགས་ཡང་ཡང་ཞུ། འཐབ་རྩོད་དང་འགོག་རྒོལ་གྱི་ཐབས་ཤེས་ཅི་འདྲ་བློ་ཕུད་དགོས་ཀྱང་སྐུ་ལུས་མེ་ སྲེག་མ་གཏོང་རོགས་ཡང་ཡང་ཞུ། བླ་ན་མེད་པའི་རེ་སྨོན་དང་དམིགས་ཡུལ་ཅི་འདྲ་ཞིག་གི་ཆེད་དུ་ཡིན་ཀྱང་སྐུ་ལུས་ མེ་སྲེག་མ་གཏོང་རོགས་ཡང་ཡང་ཞུ་བ་ཡིན།འོན་ཀྱང་ཁ་ཚོད་མེད་ལ་ལས་ངན་བཤད་བྱེད་པ་ འགའ་རེ་གོ་དུས་ང་རང་ཡིད་ཁོང་མཆི་མས་བརྣང་ཞིང་སེམས་པ་ལྷག་ཏུ་སྐྱོ་སོང་། རྐྱལ་སྟོང་ལ་ལས་གྲ་རྒྱགས་འདི་ཚོས་སྐྱིད་མི་འཁྱོག་པར་འདུག་རེ་མེད་པར་རྒྱགས་ རྩེད་རྩེ་བ་རེད་ཟེར་བ་གོ་སོང་།ཨ་མཚར་བོ།ད་ནི་ང་རང་མིག་སྐྱོན་ཡོད་པར་མ་ཟད་ རྣ་འབྱོག་ཀྱང་འོན་པ་ཡིན་ཞིག འཇིག་རྟེན་ཐོག་སྡུག་མི་ཐེག་པར་རང་ཤི་ཟེར་བ་ཡོད་པ་གོ་མྱོང་བ་ལས་སྐྱིད་མི་ ཐེག་པར་རང་ལུས་མེ་སྲེག་སྟེ་ཤི་ཟེར་བ་དེ་རིང་མ་གཏོགས་གོ་མ་མྱོང་། སྙིང་རྗེ་ནགས་ཚང་རྒད་པོ་ངོ་མ་འོན་པ་ཡིན་ཞིག རྐྱལ་སྟོང་ཞིག་གིས་གོ་རྒྱུ་འདྲ་ཞིག་མ་ཤེས་ཟིག ཡང་བསམ་མེད་ལ་ལས་འདི་ཚོ་ཅི་ཡང་མི་ཤེས་མཁན་རེད། ར་ཐོང་འཕག་སྟེ་གདུང་མ་མི་ཆོག་ནི་མི་ཤེས་པར་དོན་མེད་དུ་རང་ཤི་བརྒྱག་པ་རེད། ཟེར་འདུག ད་ནི་ང་གླ་ཕོགས་ཤིག་དང་རྫོང་དཔོན་གྱི་གོ་ས་ཞིག་གི་ཚེ་འདིར་མགོ་འཁོར་སོང་བ་ ཡིན་ནི་འདྲ་ཞིག་རེད། ཡང་མིན་ན་ལོ་རྒན་རེ་དྲུག་གི་གཉའ་བ་མནན་ཏེ་དྲན་མེད་ཤེས་མེད་དུ་གྱུར་སོང་ཟིག ངའི་མིག་ལམ་དུ་ཤེས་རྒྱ་ཆེ་བའི་ཕོ་མོ་ཐམས་ཅད་གླ་ཕོགས་དང་གོ་ས་ཞིག་གི་དོན་དུ་ ཉིན་ལྟར་མདུར་རྒྱུག་བྱེད་པ་དང་། མཁས་ཆེན་བླ་གྲ་ཚོ་རེའི་རང་སྡེ་བསྐྱུར་ཏེ་རྒྱ་བླ་བྱས་ནས་རྒྱུ་ནོར་ཆེད་དུ་ འཁྱམ་སྡོམ་བྱེད་པ་སོགས་མཐོང་བ་ལས་བོད་ས་ཡ་དྲུག་གི་ནང་དུ་ཅི་ཡང་མི་ཤེས་མཁན་ གླེན་པ་རང་ལུས་མེ་སྲེག་གཏོང་མཁན་བརྒྱ་ཙམ་ཡོད་པ་ད་ཐེངས་མ་གཏོགས་མ་ཤེས་ཟིག གླེན་པ་ནང་གི་གླེན་པ་ནི་ང་རང་ཡིན་ཟིག ཤེས་མཁན་ཚོས་སྐྱིད་པོ་ཤེས་ཤིང་། ཅི་ཡང་མི་ཤེས་ནི་ཚོས་རང་ལུས་མེ་སྲེག་གཏོང་གི་ཡོད་ཟིག མཚར་བོ་རེད། འཇིག་རྟེན་མི་འདྲ་འདྲ་ཡིན་ན་བཟང་ངན་གྱི་ཁྱད་པར་འདི་འདྲ་ཡོད་པ་མཚར་བོ་རེད། ཡང་ཁྲེལ་མེད་ལ་ལས་་་་འདི་ཚོ་གཞན་གྱིས་ངན་སྐུལ་བྱེད་པར་མགོ་འཁོར་ཏེ་མྱི་ཁར་ བརྒྱུགས་ནས་རང་ལུས་བརླག་པ་རེད། སོགས་ཟེར་འདུག མ་རུང་ཁོག་བཅུག་མཁན་གྱི་དཀར་ནག་གོ་ལྡོག་དང་འཁྱོག་བཤད་བྱེད་པར་ངོ་ཚ་མེད་ལ་ བདེན་དྲང་ཡང་ཅི་ཡང་དགོས་པ་མ་རེད།ང་ནི་ཤེས་རྒྱ་མཐོང་རྒྱ་ཆུང་སོང་ནི་ཡིན་ རྒྱུ་རེད། ངའི་ན་གཞོན་ལོ་ཆུང་རེ་གཉིས་རེ་གཞན་གྱིས་ངན་སྐུལ་བྱེད་པར་མགོ་འཁོར་ནས་རང་ ཚོད་མི་ཟིན་ནི་ཆ་རེ་ཡོད་ན་ཐང་མོད། ཤེས་ལྡན་མཐོང་རྒྱ་ཆེ་བའི་བླ་མ་གྲྭ་བ།ཡང་ན་མྱི་སྐྱ་ཕོ་མོ་དང་། ལྷག་པར་དུ་གུང་ཐང་རིན་པོ་ཆེའི་ཨ་མྱེས་འདྲ་བའི་ཤེས་ཆེན་དང་སྤྱི་ཚོགས་ཀྱི་ ཉམས་མྱོང་ལྡན་པའི་སྐྱེས་མཆོག་རྒན་རབས་རྣམས་ཀྱིས་རང་གི་བླ་ན་མེད་པའི་རེ་ སྨོན་དང་དམིགས་ཡུལ་ཞིག་གི་དོན་དུ་རང་ལུས་མེ་སྲེག་བཏང་སྟེ་མཆོད་འབུལ་བྱེད་པ་ ཡིན་རྒྱུ་རེད་བསམས་པ་མ་གཏོགས་ཁོང་རྣམས་ཀྱང་མི་གཞན་གྱིས་ངན་སྐུལ་བྱེད་པར་ མགོ་འཁོར་ཏེ་རང་ལུས་མེ་སྲེག་གཏོང་བ་ཡིན་རྒྱུ་རེད་བསམས་པ་དེ་རིང་མ་གཏོགས་ ངའི་ཞེ་ནི་འཁོར་མ་མྱོང་། སེམས་ལ་དྲན་མ་མྱོང་། ད་བཟང་ངན་ཅི་བཤད་ཀྱང་ང་འདྲ་བའི་སྡར་མ་ཞིག་གིས་རང་གི་རྒྱབ་གར་དྲོས་དང་རང་གི་ ཕོ་བ་གར་རྒྱགས་ཙམ་ལས་གཞན་ཅི་ཡང་ཤེས་ཀྱིན་མེད་པ་དེ་རིང་ནས་ཧ་གོ་སོང་། ཡིན་ནའང་། ས་གར་སོང་ས་ནས་གོ་ཐུབ་པ་དང་། གར་བསྡད་ས་ནས་ཤེས་ཐུབ་པ་ཞིག་ནི། རང་ལུས་མེ་སྲེག་གཏོང་མཁན་ཀུན་གྱི་གཅིག་མཐུན་གྱིས་རེ་འབོད་བྱེད་པ་ནི་ཡིད་ བཞིན་ནོར་བུ་རང་ཡུལ་དུ་གདན་འདྲེན་ཞུ་དགོས་ཞེས་པ་འདི་ཡིན། འདི་ལ་ནོར་འཆུག་ཅི་ཡང་ཡོད་པ་མ་རེད། འདི་ནི་ཁོང་རྣམས་ཀྱི་རེ་བ་ཙམ་མ་ཡིན་པར།བོད་མི་ཡོངས་ཀྱི་འགྱུར་མེད་ཀྱི་རེ་བ་ ཡིན་པ་འཛམ་གླིང་ཡོངས་ཀྱིས་ཧ་ཅང་གསལ་བར་ཤེས་པ་རེད། རང་དབང་དང་། རེ་འདོད།ཐ་ན་དབང་འཛིན་སྲིད་གཞུང་ལ་འཐབ་རྩོད་དང་འགོག་རྒོལ་སོགས་བྱེད་པ་ལ་ ཐབས་ཤེས་མང་བོ་ཡོད་པ་རེད།དེ་རིང་ཁ་སང་།ཏང་གི་མགོ་ཁྲིད་བཟང་བ་དང་།སྲིད་གཞུང་ གི་སྲིད་ཁྲིམས་བཟང་བ།དཔལ་འབྱོར་འཕེལ་རྒྱས་དང་མང་ཚོགས་ཀྱི་འཚོ་བ་ཇེ་བཟང་ཡིན་ སོགས་ཟེར་བའི་དུས་སྐབས་འདིར་མི་རང་དང་། ཡང་ན་མི་མང་ངམ་མི་རིགས་ཤིག་གི་རེ་བ་དང་།འདོད་མོས་ཅི་ཡོད་སོགས་ཁྲིམས་མཐུན་ གྱིས་རེ་འདོད་ཡི་གེ་སོགས་བྲིས་ཏེ། རང་སའི་ཏང་སྲིད་ལས་ཁུངས། ཡང་ན་ཁུལ་དང་ཞིང་ཆེན། ཐ་ན་ཀྲུང་དབྱང་ལ་ཞི་བའི་ངང་རེ་བ་ཞུ་ཆོག་པ་ལ། ཡིན་གཅིག་མིན་གཉིས་རང་ལུས་མེ་སྲེག་བཏང་སྟེ་འགོག་རྒོལ་བྱེད་དགོས་དོན་མེད་པ་ འདྲ་ཞིག་རེད། འདི་ཡང་ངས་ཅི་ཡང་མ་ཤེས་པར་གླེན་གཏམ་ཡིན་ན་ཐང་། འོན་ཀྱང་།ང་རང་གིས་ཡང་བསྐྱར་རེ་འབོད་བྱེད་འདོད་པ་ནི་གོང་གསལ་ལྟར་སྐྱེས་ མཆོག་རྣམས་གཏུམ་དྲག་གི་མནར་གཅོད་ཅི་འདྲ་ཁུར་དགོས་ཐུག་ཀྱང་སྐུ་ལུས་མེ་སྲེག་ མ་གཏོང་རོགས།འཐབ་རྩོད་དང་འགོག་རྒོལ་གྱི་ཐབས་ཤེས་ཅི་འདྲ་ཕུད་དགོས་ཀྱང་སྐུ་ ལུས་མེ་སྲེག་མ་གཏོང་རོགས།བླ་ན་མེད་པའི་རེ་སྨོན་དང་དམིགས་ཡུལ་ཅི་འདྲ་ཞིག་གི་ ཆེད་དུ་ཡིན་ཡང་སྐུ་ལུས་མེ་སྲེག་མ་གཏོང་རོགས་ཞུ་བ་ཡིན། ངས་ལྷག་ཏུ་རེ་སྨོན་ཞུ་འདོད་པ་ནི།དྲིན་ཅན་རྩ་བའི་བླ་མ་སྐྱབས་མགོན་ཡིད་བཞིན་ ནོར་བུ་ལགས་བོད་ཡུལ་ན་དྲག་ཏུ་འབར་བའི་མེ་ལྕེ་ཡི་ཚ་དམྱལ་གྱི་སྡུག་བསྔལ་འདི་ ལ་གཟིགས་རོགས་ཞུ་བ་དང་།བོད་མི་སྐྱེས་མཆོག་རྣམས་ལ་སྐུ་ལུས་མེ་སྲེག་མ་གཏོང་ ཞེས་པའི་གསུང་ཞིག་འབྱོན་རོགས་ཡང་ཡང་ཞུ་བ་ཡིན། མཛའ་བརྩེའི་གྲོགས་པོ་ཧྲེ་ཧོར་བློ་བཟང་ཆོས་འཕེལ་སོགས་ལགས།བོད་མི་རིགས་ཀྱི་ བདེ་སྡུག་ལ་སེམས་ཁུར་དང་།མི་རིགས་མཐུན་སྒྲིལ།སྤྱི་ཚོགས་བདེ་འཇགས་བཅས་ལ་ སྲུང་སྐྱོབ་བྱེད་པ་ནི་ང་ཚོས་མ་བསྐུལ་དང་བླངས་དགོས་པའི་འོས་འགན་ཡིན་པར་འདོད། དྲ་རྒྱ་ཐོག་ཏུ་དྲི་བ་ཅི་ཡོད་ལ་དྲང་བདེན་གྱི་ལན་རེ་འདེབས་འདོད་ཡོད་པས།འདིར་ རང་གི་ཆ་མི་ཚང་བའི་བསམ་ཚུལ་ཅུང་ཙམ་བྲིས་ཡོད་པར་གཟིགས་དང་། ནོར་འཁྲུལ་རེ་ཡོད་པར་དགོངས་དག་ཞུ་འདོད། ནགས་ཚང་ནུས་བློས་གུས་ཕུལ། སྤྱི་ལོ་༢༠༡༣ལོའི་ཟླ་ཚེས་བཟང་བོ་ལ། ནགས་ཚང་ནུས་བློའི་མཚམས་སྦྱོར་མདོར་བསྡུས། སྤེལ་དུས། 2012-05-07 15:58:55 ཡོང་ཁུངས། མཚོ་སྔོན་བོད་རིགས་དྲ་བ། རྩོམ་ པ་པོ། ངེད་དྲ་བ། ཀློག་གྲངས། 346 ནགས་ཚང་ནུས་བློ། ༼ནུས་ལྡན་བློ་བཟང༽ ཕོ། སྤྱི་ལོ1948ལོ། བོད་རབ་བྱུང་བཅུ་དྲུག་པའི་ས་ཕོ་བྱི་བའི་ལོའི་ཧོར་ཟླ་བརྒྱད་པའི་ཚེས་བཅོ་ལྔ་ ཉིན། ཀན་ལྷོ་རྨ་ཆུ་རྫོང་ཆུ་ཁ་མ་སྡེ་བའི་ནགས་ཚང་དགྲ་འདུལ་ཚང་ནས་སྐྱེས། ཆུང་དུས་ཕ་རྒན་དང་མཉམ་དུ་བླ་བྲང་དགོན་པ་དང་། ལྷ་སའི་སེ་འབྲས་དགའ་གསུམ་སོགས་དགོན་པ་གྲགས་ཅན་དུ་མཆོད་མཇལ་ལ་སོང་མྱོང་། 1959ལོའི་ཟླ12པར་ཆུ་དམར་ལེབ་རྫོང་མི་རིགས་སློབ་འབྲིང་ནས་སློབ་སྦྱོང་བྱས། 1964ལོར་ཡུལ་ཤུལ་ཁུལ་མི་རིགས་དགེ་ཐོན་ སློབ་གྲྭ་ནས་མཐར་ཕྱིན། 1965ལོར་མཚོ་ སྔོན་ཞིང་ཆེན་མི་རིགས་སློབ་གྲྭར་སློབ་སྦྱོང་བྱས། 1965ལོའི་ཟླ10བར་ལས་ ཀར་ཞུགས་ཏེ་ཆུ་དམར་ལེབ་རྫོང་སློབ་ཆུང་གི་དགེ་རྒན་བྱས། 1967ལོར་འབར་དགོན་སློབ་ཆུང་གི་དགེ་རྒན་ བྱས་པ་དང་། 1971ལོ་ནས་འབར་དགོན་ཤང་ གི་སྤྱི་བདེ་ཆེད་མངགས་པའི་འགན་བླངས། 1979ལོར་ རྫོང་མི་དམངས་ཁྲིམས་ཁང་གི་ཁྲིམས་དཔོན་གཞོན་པའི་འགན་ཁུར། 1984ལོ་ནས་རྫོང་ཁྲིམས་འཛིན་ཅུའུ་ཡི་ཅུའུ་ ཀྲང་གཞོན་པའི་འགན་ཁུར། སྔ་རྗེས་སུ་ཁུལ་དང་ཞིང་ཆེན་གྱི་ཏང་གི་སློབ་གྲྭ་རུ་སོང་ནས་སློབ་སྦྱོང་བྱས་པ་ དང་། ཁྱད་པར་དུ་ཞིང་ཆེན་དང་ཀྲུང་དབྱང་གི་སྲིད་ཁྲིམས་ལས་བྱེད་སློབ་གྲྭར་སོང་ནས་ ཟབ་སྦྱོང་ལེགས་པོ་བྱས། 1987ལོར་ཆུ་ དམར་ལེབ་རྫོང་གི་རྫོང་དཔོན་གཞོན་པའི་འགན་ཁུར། 1990ལོར་ཡུལ་ཤུལ་ཁུལ་འབྲིང་རིམ་མི་དམངས་ཁྲིམས་ཁང་ལ་ལས་གནས་ སྤོར། 1993ལོ་ངལ་གསོས་རྗེས་ལོ་འགའི་ རིང་། ཁོས་མིང་གྲགས་ཅན་གྱི་བླ་སྤྲུལ་དང་ཕྱི་རྒྱལ་གྱི་གྲོགས་པོ་སོགས་ཀྱི་འབྲེལ་བ་ བརྒྱུད་པ་དང་། ཁྱད་པར་དུ་ཀན་སུའུ་ཞིང་ཆེན་བླ་བྲང་དགོན་པའི་གསེར་ཁྲི་གུང་ཐང་བསྟན་པའི་དབང་ ཕྱུག་མཆོག་གི་རྒྱབ་སྐྱོར་དང་ཐུགས་ཁུར་འོག་ཏུ། མ་དངུལ་བསྡུས་ཏེ་ཆུ་དམར་ལེབ་རྫོང་ཐོག་ཏུ་ཆོས་ལུགས་བྱེད་སྒོ་སྤེལ་སའི་ས་ ཚིགས་ཤིག་བཞེངས་པར་མ་ཟད། ད་དུང་བཀའ་འགྱུར་དང་། ཡིག་བརྒྱ། མ་ཎི། ཐར་མདོ་སོགས་ཀྱི་འཁོར་ཆེན་བཞི་དང་འཁོར་ཆུང་ལྔ་བརྒྱ་ཙམ་བཞེངས་ཏེ་ཆོས་དད་མང་ ཚོགས་ཀྱི་རེ་བ་བསྐངས། སྔ་རྗེས་སུ་ཁུལ་མི་རིགས་དགེ་ཐོན་སློབ་གྲྭ་དང་རྫོང་མི་རིགས་སློབ་འབྲིང་། ཕ་ཡུལ་གྱི་ཆུ་ཁ་མའི་སློབ་ཆུང་བཅས་ལ་ཨ་སྒོར་གྱིས་རོགས་སྐྱོར་བྱས་མྱོང་། ད་ལྟ་ཁོས་མཚོ་སྔོན་བོད་རིགས་ཞིབ་འཇུག་ཚོགས་པའི་རྒྱུན་ལས་བློ་འདྲི་ས་དང་། ལས་འཛིན་པ་བཅས་ཀྱི་འགན་བཞེས་ཏེ་ལྷག་བསམ་རྣམ་དག་གིས། “ང་ནི་བོད་རིགས་མི་དམངས་ཀྱི་བུ་ཕྲུག་ཅིག་ཡིན། བོད་རིགས་མི་དམངས་ལ་ཕན་པ་ཡོད་པའི་བྱ་བ་ཞིག་ཡིན་ན། ང་རང་གིས་ནུས་ཤུགས་ཅི་ཡོད་ཀྱིས་སྒྲུབ་རྒྱུ་ཡིན”ཞེས་པ་ནང་བཞིན་མུ་མཐུད་དུ་ འབད་པ་མཛད་བཞིན་མཆིས་སོ།།